Mr. Korea Chicken (Closed)

雖然星星熱潮稍為冷卻，但韓式炸雞店仲有唔少。一直冇機會試吓，今日終於揀咗呢間，貪佢位置方便，又話自己係韓國過江龍。 一上去就發覺同本地餐廳好唔同。除咗唔少淨係識韓文同英文嘅女侍應，k-pop 不停播，同埋枱櫈擺法好街邊feel (雖然佢位置仲高過隔離舊樓)外，最大特色係... 開窗! 到客人漸多先關窗開冷氣，本地食肆一定唔會咁做囉，因為大家都好清楚知道喺石屎森林嘅香港咁做嘅後果: 窗口位鋪晒塵，唔坐窗口位又焗… 大概韓國人生活習慣真係唔同，諗住叫沙律汽水(本人唔飲酒，所以今餐唔係正宗大杯酒大塊肉，哈)跟炸雞食感覺冇咁熱氣，點知兩樣都唔凍嘅! 粟米沙律裏面仲有大量洋蔥，未食入口齋聞都好大陣味… 主角出場，大盤炸雞有原味有辣味。但原味都有少辣，辣味其實又唔太辣。原味嘅微辣同香料味唔太突出，辣味酸酸辣辣幾惹味，但其實味道同水牛雞翼差唔多。食落，感覺其實KFC都唔太差，起碼偶有佳作又可以散叫… 始終，覺得正宗韓食真係唔係我杯茶…