好好運快餐店 (Closed)

沙嗲牛肉麵係普遍香港人的例牌早餐，但一間食店能把一個早餐賣足全日，仲要咁多人排晒隊等位真係唔講得笑。今日慕名而來親嚐出晒名嘅沙嗲牛肉麵，下午4點嚟到唔駛等位，餐廳枱唔多但坐得都舒服，雖然餐廳都有其他食物，但眼見個個都係食沙牛麵，一個麵餐另加兩款餸包冷熱飲品$50。我點了沙嗲牛肉麵+榨菜肉絲+炒蛋及凍檸茶。麵煮出來嘅時間剛好，煙韌彈呀麵質爽口，雖然佢只係一個普通嘅大光麵，但控制到個時間剛剛好。先飲啖湯，湯底比一般茶餐廳嘅湯底要濃，再食一件沙嗲牛肉，嘩！好味到呢！濃厚的沙嗲醬食得出好香的花生醬味，牛肉淋且掛上沙嗲醬的香味，真係好好味；再試下個榨菜肉絲，呢個榨菜肉絲係自己炒，肉絲份量唔多，有淡淡的辣椒及蒜香味而榨菜更加係無得頂，完全無鹹味，榨菜爽口仲要有蒜香，呢個榨菜肉絲整得好好味，炒蛋無乜特別加左奶落去炒好滑。成碗麵真係無得挑剔，唔怪之得咁多人排隊都要食啦。