沙嗲王 (Closed)

我都好耐冇去過沙爹王，我最鍾意食沙爹王的白咖喱，所以我以前去親都係食呢款，今次當然唔例外啦!我最初冇留意到有個自選一餐的餐牌，咁咪散叫攞，落左單後5分鐘比我發現到，我即刻同侍應講要求改單，侍應又好好，即刻幫我問廚房，好彩廚房仲未整，真係合時啦! 哈!結果我改左食自選一餐的白咖喱豬扒飯，可配餐湯或小食拼盤，因為朋友叫左龍蝦肉濃湯，所以我就要左小食拼盤，飲品比朋友飲，佢揀左熱檸茶，仲有雪糕食添，真抵食~白咖喱同闊別多年的味道一樣咁好味，甜甜地、輕量辣味，豬扒整得好林、鬆軟，唔會咬極都咬唔開。白咖喱豬扒配埋一齊食飯，特別好配飯，食到一D汁同一D飯都唔好浪費，讚!小食拼盤有泡菜、青豆角同春卷，我覺得泡菜味道一般，始終唔係正宗，都係韓國餐廳果種好食，青豆角冇乜味，春卷細細條BB咁，好得意，味道尚可接受。朋友的龍蝦肉濃湯好唔掂，好粉，落得太多生粉開呢個湯，雖然夠稠，但唔好飲。龍蝦肉得果幾粒仔，15蚊係咁上下，最差的係個湯太咸，朋友飲左一半都唔想再飲落去啦!雪糕係雀巢牛奶公司果D，冇得揀味道，我呢杯係朱古力。