Video
Read full review
2022-01-18
1941 views
星期一至五及星期日，基本上我倆公婆都會晌屋企食早餐，而星期六喺最輕鬆，朝早最無乜嘢搞嘅日子，所以，就會出街晌美孚周圍搵吓食、輕鬆吓，之後可能行吓公園，或行一轉短山。今次嘅選擇喺盈暉薈嘅「雲石堡」，呢個場越做越沉，幾間食肆撐得住都喺完全靠街坊生意，基本上唔會有區外客過嚟，因為真喺有少少隔涉，而呢個鋪位轉過幾手，依家嘅「雲石堡」算喺做得長。 餐廳嘅格局喺L形，裝修都喺基本嘢，但有別一般茶記咁光光猛猛，都喺昏昏暗暗搞吓情調咁。全場主要都喺4人卡位，而且，將啲卡位背板都間高咗好多，所以，影出嚟嘅環境相都淨喺睇到啲板，哈哈！ 由於都喺4人卡位，疫情下客人都唔願意搭枱啦，所以，部份卡位會晌枱上棟多一板間板，變相做成兩張二人枱，務求繁忙時段做多少少生意。不過，我咃星期六早市嚟，真喺客人唔多，點坐都得。 基本餐具、調味料已一早放晒晌枱，雖然環境所做嘅防疫幾好，不過，餐具無遮無掩就咁放晌上枱始終感覺無咁好，但依家喺唔喺都搵店員要杯熱水消毒吓啲餐具，求個安心。 早餐一個餐牌一板紙睇晒，A-K共11款選擇，定價$26-$40，款式都喺晌茶記慣有嘅款式；而另一版喺啲特餐、常餐、兒童餐，定價就貴啲，為$48-$
餐廳嘅格局喺L形，裝修都喺基本嘢，但有別一般茶記咁光光猛猛，都喺昏昏暗暗搞吓情調咁。全場主要都喺4人卡位，而且，將啲卡位背板都間高咗好多，所以，影出嚟嘅環境相都淨喺睇到啲板，哈哈！
由於都喺4人卡位，疫情下客人都唔願意搭枱啦，所以，部份卡位會晌枱上棟多一板間板，變相做成兩張二人枱，務求繁忙時段做多少少生意。不過，我咃星期六早市嚟，真喺客人唔多，點坐都得。
基本餐具、調味料已一早放晒晌枱，雖然環境所做嘅防疫幾好，不過，餐具無遮無掩就咁放晌上枱始終感覺無咁好，但依家喺唔喺都搵店員要杯熱水消毒吓啲餐具，求個安心。
早餐一個餐牌一板紙睇晒，A-K共11款選擇，定價$26-$40，款式都喺晌茶記慣有嘅款式；而另一版喺啲特餐、常餐、兒童餐，定價就貴啲，為$48-$50，但就全日供應，萬一早餐類真喺完全無樣啱食，都仲有啲後備選擇。
埋單時晌收銀處見有啲外賣單張攞，所以，掃瞄貼埋出嚟俾大家參考，睇落就應該有齊晒餐廳嘅所有出品。
炒滑蛋牛油厚多士 我哋所揀嘅兩款早餐，都配上炒蛋多士， 睇樣就一般般啦，因為炒滑蛋又唔喺好滑蛋樣，多士更加唔喺厚包嚟，基本上，就喺一般嘅炒蛋加多士，唔差嘅，只喺基本而已，索性擺埋一齊當蛋治咁食。
早餐K 健怡早餐 $30 老婆揀嘅早餐K，就哋除炒蛋多士外，仲配時菜粟米通粉，全素嘢，啱晒佢。通粉無煮過腍喺基本，但有唔少快餐店或茶記為方便，煮定一大鍋又唔過冷河或降溫，啲餘溫咪整腍晒啲通粉囉。而配以大量生菜同粟米粒，襯雞湯底，夠健康，但味道就當然會普普通通啲啦。
早餐F 特色早餐 $38 小弟就揀配淡牛脷湯意粉，好得意，平常啲餐廳會寫鹹牛脷，但佢哋就寫到明淡牛脷，但食落就真喺一啲都唔淡煎得幾香口，入口富柔韌感，好有牛脷嘅獨特羶香味。湯意粉亦OK啦，最緊要無煮腍都收貨喇，加上份量足，食完都好飽吓。
熱奶茶、熱檸水呢個喺我同老婆落茶記嗌餐飲嘅慣性組合，佢唔喺嗌熱檸水，就喺熱好立克，啲檸檬落得足，又夠清香。而小弟杯奶茶稱唔上好滑，但茶底算喺芳香，稍嫌花奶多咗啲啫。
幾十蚊食個早餐，唔使準備、唔使煮，食完走得，真喺晌香港地喺落茶記、快餐店先可以咁。輕輕鬆鬆，又可以行吓短山喇！
Post
