新志記海鮮飯店 (Closed)

每次來到新志記, 一定係為左佢地的燉湯同生炒糯米飯, 唔敢話佢地係最好, 但係水準同價錢已經完全係物超所值. 雖然佢地的老伙計服務麻麻佢地燉湯有好幾種, 有海底椰螺頭燉雞腳, 沙蔘玉竹燉龍骨, 但係秋冬季我就偏愛杏汁菜膽燉豬肺($60), 不過呢個湯經常賣晒, 所以我通常電話預訂, 個湯好足料, 燉盅內有大量南北杏, 白菜膽, 豬肺, 金華火腿, 痩肉, 完全無落味精, 有大白菜的鮮甜, 燉足幾個鐘, d料出晒味, 又唔油, 一盅大概有5-6碗, 賣幾十蚊真係好抵!! 仲好過自己煲!!另一個叫左一碗名物係生炒糯米飯($38), 其實已有好多媒體介紹過, 呢度的糯米飯係真正的生炒, 唔係出面'扮'生炒, 佢地將d糯米由生炒到熟, 炒到手都軟, 誠意可加, d糯米唔'林'又唔油膩, 而且材料亦算不少, 包括臘肉, 臘腸, 蝦米, 冬菇, 面頭再鋪上花生, 芫茜, 中芹, 色香味俱全, 粒粒皆炒得平均, 唔會有d有色, 有d無色, 真係絕對的出色 一年四季都有得食, 喜歡的真係值得一試