協盛大排檔 (Closed)

好多年前成班朋友黎過，第一次坐喺街邊打邊爐，覺得好正！幾年後終於又再有機會再黎！當晚無book位，去到大概8點左右，因為有少少飄雨，所以本來老闆話開唔到枱，後來就叫我地拍埋啲坐，咁就有得食啦！✌叫左芫荽皮蛋湯底先，芫荽味聞落都幾勁，但食落無乜。2個人唔食得多, 所以有啲嘢想食但叫唔到，好似餃子呀雲吞呀咁，一碟成12隻，食唔哂🙈最後叫左手切肥牛，西洋菜，金菇，花甲，炸魚皮，四寶丸仲有公仔麵同汽水。（2條友都食唔少嘢😂）雖然好多人，但啲店員服務態度非常好，我問左好多問題佢地都好有耐性答我。啲嘢食好快就送到，多到張枱都放唔哂，店員即刻拎張櫈俾我地放。手切肥牛嘅份量都幾多，絕對夠2~3個人食，食落同平時嗰啲急凍牛肉唔同，會厚身少少同細塊啲，食落比較有口感。花甲好新鮮，$128有6大隻，好抵食呀！啲花甲上枱嗰陣仲識郁，勁新鮮！烚耐左但都唔會韌，好好味。炸魚皮好脆，我地就咁食都食左好多。四寶丸入面有手打墨魚丸同蝦丸，另外2隻係牛丸同唔記得左咩丸，細細粒我鍾意，可以試又唔會話太飽。金菇同西洋菜就無咩特別。最後加個公仔麵就完滿！傳統Gas爐下次會再幫襯！