民華餐廳

Open Now

Now Closed

一直愛食民華餐廳嘅常餐因為份量夠飽之餘，味道亦相當好，所以間唔中都會去幫襯今日中午時份又同兩個朋友去食晏，一人點左一個常餐，我要沙嗲牛肉麵，佢就要薑絲牛肉通粉，常餐仲包咗厚多士，炒蛋/煎蛋配火腿或者餐肉，連凍飲都唔使50蚊，算抵食。另外我哋今日重點多咗西多士同燒賣西多士可選擇煉奶或者糖漿，咁我哋揀糖漿，因為多少可以自己隨意加減，西多士厚身，炸起嚟都鬆化，麵包唔會好硬，亦都有軟熟嘅感覺，上枱已經切好，方便食用。講返個沙爹牛麵 點解咁鍾意食全因為個沙嗲醬，佢嘅沙嗲醬唔係一般茶餐廳嗰種流質嘅醬汁，而係比較固狀，有花生沙嗲香味，浸入湯中後成碗都會食到有醬料粒嘅麵，個感覺好正，仲非常香濃薑絲牛肉通粉嘅薑味都幾突出，湯夠味，唔會淡茂茂，牛肉就亦唔會好老，又幾大碗，加上厚多士，香脆得來唔會焦，蛋亦炒得夠香滑，全部食晒都真係幾飽。雖然如此，但係都忍唔住叫多咗一份燒賣$17有四粒，仲要係大大粒，以肉為主，雖然無鮮蝦，但係加埋辣椒油食，味道都唔錯。凍飲無論奶茶同凍檸茶都唔錯，正常水準。最後埋單每人平均先60幾蚊，喺旺角來講都算相當抵食，飽到捧住個肚走。