奧壽司

Open Now

Now Closed

呢個星期去到幾偏遠下的數碼港，扮下上等人食貴價日本野。閒日夜晚黎食，係呢頭黎講預左唔會多人，地方闊落尚算清靜，吧檯位仲可以見到三位師傅即時處理刺身等。小弟點左一份細的壽司拼盤，總共9款壽司，除左加州卷外每款一件，望落刺身算晶瑩剔透，唔點壽司豉油食都有份鮮味係度，壽司飯食落仲係暖暖地，唔似出面果d整到凍冰冰。另外點左份刺身拼盤，有小弟最愛食的吞拿魚，食落一d都唔「鞋」，同其他刺身一樣都係厚切，唔係好捨得一啖吞哂成件，魚類唔腥，幾肥美，蝦好鮮甜。因為小弟鐘意食刺身，所以跟風叫左個是日special, 都係刺身類叫金目鯛，肉色幾嫩，帶粉紅色，肉質厚實帶點爽甜，除左有少少魚筋之外差唔多全部都係入口即溶，幾好食。之後再叫左幾份小食，燒魷魚筒，火侯還好，唔會燒到太燶太韌，汁唔算多但係都夠哂味，有點似離島的燴魷魚風味。餃子釀雞翼，燒得唔錯，餃子肉同個汁幾夾，可惜的係兩款熱食可能之前擺耐左，唔算太熱。最後一款係特色三文魚，即係三文魚魚生粒伴青瓜絲及鵪春蛋，不過可能自己食唔慣生的鵪春蛋，拌埋一齊之後有點膩。不過加上松子仁，多重口感都ok。總括黎講，壽司刺身類還是較好，最緊要刺身真係好新鮮。