Chatuchak (Closed)

時間不多，一心想快靚正食飽便開工，在銅鑼灣行過馬路諗住就腳去某間頗具歷史的雲吞麵店食碗細蓉開心一下。行到門前望一望餐牌，見到有豬骨湯底雲吞麵77蚊一碗。今天沒心情新嘗試，再望望正常的：雲吞麵+飲品63蚊，估計凍飲加三蚊的話即是66蚊。座落在銅鑼灣地鋪我不能喊碗麵貴，但我選擇了雜開。行多幾步搭埋𨋢上了希慎廣場10樓food court，吃碗Pho吧，都是湯粉麵，異曲同工啫。雞絲湯河56蚊，啱數！誰不知收銀櫃枱寫明Cash Only，撞啱當天沒有現金，無緣了。兜了個圈，終於找到今天的緣分: Chatuchak泰式海南雞飯68蚊，我加10蚊轉雞脾即是78蚊。你可能會說:「無嘢飲喎，咪仲貴咗？」首先，其實我通常出街都有自備飲料，那杯凍檸茶小甜對我來說是可無多過可有可無的，為餐而飲，有得揀我真係會唔飲。其次，一碟海南雞脾飯我會飽；一碗雲吞麵加杯凍飲我一定唔飽。多12蚊的結果是飽與唔飽的差別，我當然選擇前者。結果這碟78蚊的海南雞飯不負所托，我滿意地飽了。其實今餐的緣分不是無端端發生的，早前有一次帶姪仔來吃過一次，見他食到一粒飯都無剩，我早就想來食番餐。今日，如願以償。