協盛大排檔 (Closed)

打邊爐，不外乎牛肉要靚，海鮮新鮮，如果加埋啲丸丸餃餃又好味，再加埋仲有出色嘅煲仔飯，再再加埋經濟實惠，咁就真係冇得頂！喺天后嘅【協盛大排檔】就幾乎接近呢個要求！除咗環境……呢度位處銅鑼灣街市附近橫街，一到夜晚，成條街都係佢地霸晒，而我地坐嘅位置，就喺正隔離紙紥舖門口，喺我頭頂，吊住一紥紥金銀衣紙，正所謂…舉頭望衣紙低頭滾雞子尤其喺呢段萬聖節期間，都可謂非常應節！先邁手切肥牛，一望已覺得對板，食過都尚算甘香，合格！再嚟花蝦，夠晒生猛，肉質夠爽又鮮味，出色！ 一人一隻蟶子皇，新鮮又冇沙，掂當！ 仲有自製蝦丸，超級彈牙，極品！仲有墨丸鱔片炸魚皮……樣樣都有返咁上下，唔怪得d枱擺滿成條街！食到一半，雖然有少少飽飽地，但損友話一場嚟到，冇理由唔試埋個煲仔飯，試咪試！就叫個排骨煲仔飯，損友居然話不如加條臘腸，我就話不如晒冷，唔爭在要埋潤腸！結果一煲雙腸排骨煲仔飯，令成枱人飽到上事業線！好滿足！埋單一人二百二，呢餐邊爐……認真抵打！