南北小聚

Open Now

Now Closed

日期：9月21日人數：2人作為銀行從業員，有時一啲培訓課程會喺上環舉行，而有啲朋友亦喺上環返工，所以我有時會喺上環食lunch。而呢間餐廳可以話係又抵食，坐得又唔錯，味道又可以接受，地理位置又好嘅一間餐廳。平日去食lunch通常都要等位。今次係兩個人去食lunch，叫咗水煮牛肉同埋辣子雞，一個配飯，一個配擔擔麵，嘢飲就係正正常常嘅檸檬茶。牛肉份量絕對唔少，一般滑牛肉既水準，仲有配上芽菜、娃娃菜、同埋粉條。辣度足夠，食起身幾過癮。辣子雞份量亦都唔細，但稍為覺得雞肉有啲肥。擔擔麵爽口彈牙，湯底惹味。兩個套餐連埋飲野，埋單$130都唔使，個人覺得係好抵食。其實食物選擇都好多，例如有水煮魚、酸菜魚、口水雞、麻婆豆腐、回鍋肉，如果唔食得辣一樣有醉雞同埋排骨菜飯揀。餐廳有唔少梳化位，坐得幾舒服。環境衛生幾好。由於係星期六，所以冇乜人，服務反應算唔錯。餐廳就喺上環地鐵站干諾道中出口行1分鐘就到，非常方便。