北海丼 (Closed)

之前嚟過幾次，雖然唔食生嘢，但係都有好多熟食丼同小食選擇，仲有最重要係有我最鍾意嘅稻庭烏冬！最近留意到新出咗湯咖喱套餐，同平時嘅套餐相若，有前菜同小食，不過主角就係湯咖喱，同埋今次唔係跟丼飯而係白飯，送咖喱食，非常夾！第一次食，叫咗海鮮湯咖喱試試，配大大塊吉列豬扒。雖然無喺日本食過，但有聽朋友講過正宗湯咖喱係點，其中一種做法係加番茄去煮，呢度食得出係加咗加番茄，少少甜，不過同時保留到辣味，唔錯喎！望落有少少油，但係食就唔覺得太油膩。隻大蝦好鮮味，結實彈牙，其他魚都幾好，野菜都好有驚喜，入晒味，唔係配角咁簡單！豬扒炸得好靚，同埋真係好足秤...朋友叫咗啲魚生丼，雖然我無食，不過都睇到好新鮮好足料，其中有啲丼仲做緊買一送一，非常抵食。餐廳環境夠闊落，就算有時客多都唔怕，仲可以坐得鬆。