老夫子港式餐廳 (Closed)

約咗朋友去九龍灣睇戲，睇戲之前搵間餐廳醫肚，見到呢間老夫子餐廳裝修得幾靚，就入咗去試啦。因為時間所限，揀咗二人餐。二人餐包左燒味拼盤，蔥油肥雞半隻，上湯浸時蔬，雞湯米粉或者白飯，仲有熱飲兩杯添。呢度裝修得好靚，門口有啲老夫子figure可以打卡影吓相添。等左10分鐘左右就上菜，燒味拼盤都幾多嘢食，有叉燒、燻蹄、紅腸、海蜇。叉燒超好食，夠晒肥，面頭有夠晒甜。海蜇同燻蹄點醋食都非常之好啊。蔥油肥雞超大隻，仲有好多髀位添。蔥油肥雞大隻到我哋兩個人都食唔晒呀。雞湯米粉比我想像中好食，雞湯非常之濃郁，米粉上面仲有幾舊冬瓜添，感覺非常之健康啊。兩個人食呢個二人餐真係飽到出汁啊。