珍意泰國菜館 (Closed)

聽講東大街呢間泰國嘢幾好食又抵食，所以星期日下午嚟試下，大概十二點半嚟到唔使等就有位，坐低咗一陣就開始有人喺門口等位，好彩早一步。午市套餐有十六款選擇，有飯有粉麵揀，由$52起。套餐包埋飲品，特飲例如青檸梳打就要加$10點咗濕炒牛肉片河同香葉辣椒豬扒飯。等咗幾分鐘濕炒肉片河就上枱，芡汁有好多款蔬菜，份量仲幾多，而且唔會太油膩。牛肉片幾滑唔韌，河粉比起港式嘅更闊更厚，食落有少少煙韌，最重要係有鑊氣香葉辣椒豬扒飯嘅豬扒係吉列豬扒，份量都幾多，但有汁浸住所以唔太脆。香葉辣椒汁偏甜有辣椒香味，好啱送飯。但一啲都唔辣，可能為咗遷就香港人口味，如果可以揀辣度會更好。午市套餐好抵食，質素唔錯而且份量夠大，一定食得飽。下次會再幫襯，試下其他菜式。