金不換泰國餐廳 (Closed)

平日晏晝去食，超級多人，等左10分鐘左右先入得去。三個人叫咗三個set lunch，每個set lunch包一杯嘢飲，另外叫咗甜品：椰汁西米糕。叫咗香草辣椒肉碎煎蛋飯，賣相吸引，辣椒同香草紅紅綠綠，好多顏色。肉碎炒得好惹味，好送飯，加埋有煎到脆邊嘅煎蛋，簡直想添飯。燒鱔飯有大舊嘅鱔塊，煎蛋同菜鋪喺飯面。鱔塊燒到香脆，上面淋左醬汁，甜甜地，唔會腥，好好味。蝦炒金邊粉夠鑊氣，上枱嘅時候熱辣辣，好多蝦，金邊粉夠乾身，唔會黐埋一舊舊，唔太油又唔會碎濕濕。多配菜，好多芽菜。味道方面，啱啱好唔會太鹹太酸。三個set lunch的份量都好多，抵食，平均一個都係$50-$70。椰汁冰同泰國奶茶都正常。椰汁西米糕甜度適中，好新鮮，質感軟滑。