湕承 · 台式便當

Open Now

Now Closed

中午食飯時間，除咗去一啲比較高級嘅餐廳，到到都人山人海，好彩有幾間專做外賣嘅小店，價錢合理，可以低價享受優質午餐，同時避疫。呢間台式便當佔地唔多，裏面係廚房，然後基本上只有一個收銀處和出餐處，落單之後都係企係側邊等。晚餐有四個選擇，白飯/烏冬/米線/新竹米粉可以任意配搭，仲可以免費追加烏冬添！每款$68 ，仲包埋一款飲品或小食，啲飲品仲要唔係普通啡茶，所以呢個價錢其實都好抵食。今日叫咗A餐牛肉蕃茄濃湯燉讚岐烏冬，配熱胎菊桂圓蜜。蕃茄濃湯的確夠濃，牛肉份量都唔少，而且唔會老晒，個烏冬都值得一讚，我好少見到話「燉烏冬」，但的確食嘅時候覺得佢啲烏冬好入味，唔知有冇關係呢？讚岐烏冬麵質彈牙，整體質素都好好。至於杯桂圓蜜，甜甜地唔會太漏，而且有兩粒菊花喺裏面，我飲完仲留返沖水飲，都仲有菊花味。另外同事叫咗個C餐黑麻油雞翼烤魚卷配滷蛋肉燥飯，呢個飯同餸就分開上，兩隻雞翼、兩條魚卷、半隻滷蛋同埋一啲青瓜粒，佢話隻雞翼好香黑麻油味，魚卷都唔差，至於飲品佢就揀咗冰台式冬瓜茶，凍飲大杯過熱飲好多，佢請我飲咗少少，甜甜地都幾好味，㗳真啲有少少似新年食嗰啲糖冬瓜嘅味道，都係唔錯嘅選擇。