粵 (Closed)

喺港島區返工嘅我喱期晏晝揾食都小心咗，唔敢亂去茶記食晏又唔想成日買上車食飯盒咁頹，所以都多咗留意酒店啲午市有冇抵食嘅午餐，比我揾到城市花園酒店嘅粵中菜廳有個套餐幾抵食！喱日就走咗去嘆咗個豐富午餐。 去酒店食有位泊車之餘防疫又做得足，食餐晏仔飽肚得嚟又放心啲吖嘛！ 喱日啱啱好4個人食仲可以而試埋半價點心，叫咗懷舊的豬膶燒賣、粟米墨魚餅同埋XO醬煎腸粉，豬膶夠濃香又軟滑下面啲燒賣好大舊仲有好多蝦肉喺入面好鬼豐滿。 粟米墨魚餅煎得香口而且都幾彈牙唔錯！ XO醬煎腸粉煎得夠香最緊要個XO醬唔太辣好啱我口味。 另外叫咗商務午餐只要＄268一個人就有6個菜好鬼豐富啫！首先嚟嘅係燒味雙拼可以自己揀鍾情嘅燒味，我就要咗蜜汁叉燒同埋龍井茶皇燻雞，叉燒食落好鬆軟味道都好好，不過茶皇燻雞就更省鏡，雞肉滑嘟嘟又燻得夠香真係正到爆。 食完燒味喱個時侯嚟一盅淮杞螺頭燉竹絲雞湯，見到入面仲有我至鍾意嘅蟲草花，嗰湯夠晒熱辣辣仲好香好甜夠晒火喉。 第三味係花雕蛋白蒸龍躉球，蛋白蒸到豬膏都冇咁滑，仲有香到不知得了嘅花雕洒香味真係引死人呀！龍躉球大大件又嫩口尤其啲魚皮位好鬼煙韌口感勁正。