euro go go

Open Now

Now Closed

晚飯時間去咗油塘大本營間 euro gogo 食嘢，對上一次食喺荃灣，印象幾好。我哋6個人，4大2小，仲有一個baby，等咗10分8分鐘就有位。叫咗4個意粉/麵。1個pizza，1個甜品，1個小食。卡邦尼意粉幾好，不過味道稍濃。菠菜汁龍脷柳闊條麵呢個都唔錯。朋友叫果兩個冇影到相，但我試咗其中一個叫香草意粉嘅，唔錯呀！有啲人話冇乜味？我唔覺喎！幾好味丫！蜜糖雞翼唔想俾阿仔食太多雞翼，mm....怕有激素，所以今次都冇俾佢食。煙肉磨菇Pizza塊餅唔厚又唔會薄到脆卜卜，我覺得咁樣反而最好味！雖然都鍾情於 pizza hut 嘅芝心批，但佢其餘嘅餅底都只屬一般，唔太啱我。法式麵包布甸呢個最遲先嚟，個個都飽哂咁滯，當然包括我。但一試就覺得好正呀！唔太甜，幾乎係我一個人食哂！想小朋友有啲菜落肚，所以放棄咗本來想叫嘅粟米著蓉（其實呢個都係想俾小朋友食）。芝士比較稀，西蘭花夠林。最後呢杯叫彩虹梳打，係推廣之一：廚師推介（官網寫嘅）。係一杯汽水入面有好多粒大大粒嘅啫喱，小朋友勁鍾意食，但真係好大粒吓，冇返咁大個口嘅都要切細啲俾小朋友食！ 我仔竟然粒粒都成舊食…吹脹！至於個汽水就緊係我飲哂啦！細路仔唔飲