泰Grill (恆隆銀行大廈) (Moved) New Location

約咗朋友喺尖沙咀行街睇戲，行到攰攰地又有啲肚餓，朋友提議去食泰國菜。我哋就去咗位於加連威老道美食坊入面嘅「泰Grill」。呢個美食坊裝修富有70年代懷舊風格，同其他food court最大嘅分別就係有親切嘅店員替你落單、攞碗筷、斟水同埋將食物送到枱上，真係服務一流。海南雞飯（$70）雞肉嫩滑冇骨，空口可以食到雞肉原味；如果沾上兩款泰國醬汁，別有一番風味。雞油飯相當大碗，差唔多等於其他餐廳兩碗嘅份量。附送嘅清雞湯看似淡然無味，其實只要淺嘗一口，就會發現佢鮮甜濃郁。串燒半打（雞、牛、豬）（$88）串燒大大串，烤得焦香，肉質鬆軟，醃料惹味而且帶有少少黑椒粒。沙嗲汁濃稠剛好，多花生粒，串燒蘸上醬汁伴食，更加美味。燒蠔（$35）即叫即燒，上枱時熱辣辣，同好似自己喺爐前面燒一樣。蠔肉唔腥，配上蒜蓉、調味料同青蔥，一啖一隻啱啱好。如果想舒舒服服咁食一餐CP值高嘅泰國菜的話，「泰Grill」係一個好選擇。