八方台式麵屋 (愉景新城)

Open Now

Now Closed

呢間餐廳位於誠品入面，個位置有少少隱蔽，但係餐廳裝修環境都好企理，好有文青風格。呢度主打台灣麵食，有單點或者套餐可以揀，亦都可以外賣珍珠奶茶。朋友今次就試蕃茄鮮濃湯系列入面嘅蕃茄水餃麵餐，揀咗韭菜餃四隻，另外仲轉咗做麻辣蕃茄湯底，個蕃茄湯底有好濃嘅蕃茄味，麻辣蕃茄好特別好惹味，個麻辣麻得好過癮，好啱食辣嘅朋友，個麵嘅質地好彈牙，由台灣麵粉整成係唔同啲，索曬麻辣湯底嘅香味。呢個餐我哋揀咗配原味鍋貼，啲鍋貼新鮮熱辣煎出嚟，個皮好香脆，餃子餡料豐富，咬落去仲有肉汁！至於我呢個麻醬控，就一定揀濃香麻醬麵，個麻醬真係香到不得了，配埋超彈牙嘅粗麵，真係好正！每個套餐都可以跟一杯台式飲品，黑糖冬瓜茶同珍珠奶茶都甜度適中，珍珠好有咬口。我哋仲叫咗個士林夜市雙拼，即係鹽酥雞拼花枝丸，2款都炸得非常香脆，花枝丸好彈牙，入面真係有花枝粒，鹽酥雞皮脆內嫰，炸到金黃色，個口味真係好似喺台灣食過啲鹽素雞咁，重點係個價錢仲要好抵食！