大勝軒丸一 (金星閣) (Closed)

黎到太古想食日本野，諗起之前有朋友話太古城都有沾麵可以食，所以就專登黎依間大勝軒丸一。間鋪唔喺商場裡面，喺近屋苑嗰邊，不過因為喺正商場隔離，所以都唔難搵。鋪裡面唔大，2點半左右黎到依然幾多客。一場黎到當然係食翻碗沾麵，我揀左大勝軒沾麵。麵可以揀普通同增量，而且係一樣價錢。仲有得揀暖嘅或者係微冷。我今次叫左增量同微冷。雖然之前睇食評見到有啲評語話覺得個湯好鹹，不過我又覺得接受到。而且冷麵又夠彈牙，將啲冷麵浸落湯，然後麵汁掛住喺啲麵到真係好正。覺得碗麵都幾大份，食完好有飽足感。我食到最後都有按照佢介紹嘅食法，叫侍應加木魚湯然後再飲。因為加湯沖淡左個鹹味，我最後都飲哂成碗。除左沾麵外，都有叫啲小食，點左餃子同埋炸雞。炸雞正正常常，餃子就好普通無咩特別同埋黎到嘅時候賣相差左少少。個人會prefer炸雞多啲。不過沾麵真係好味，而且價錢同其他類似嘅餐廳比又唔算好貴。如果黎開太古城都可以試下。