樓下冰室 (Closed)

今日約左朋友食飯，佢家陣響荃灣做嘢，佢話附近有間冰室d嘢食抵食夾大件，所以就帶左我去。呢度都幾大，响橫樑上面仲見到d懷舊擺設。座位差唔多全部都係卡位，座位寬闊，坐得舒服仲好乾淨添。餐牌有好多嘢食，見到個樣好吸引，樣樣都想食。今晚由朋友發辦，叫左一個飯，一個小食，一隻雞肶，另外兩杯特色飲品。焗鮮茄豬扒飯先到，比餐牌張相更加多。豬扒夠厚實，好有咬感，飯底嘅雞蛋比例都幾多，飯唔硬，茄汁味濃，味道酸咪咪，都幾開胃。小食係焗芝士肉醬薯角，呢個小食份量多，夠晒大碟。肉醬味道香濃，芝士份量正常，唔會過份地多，食到好漏。薯角比較粗身，薯仔味濃，焗得香脆。瑞士雞肶比出面食開嘅大隻，聞到好香，入口味道甜甜地，肉厚得黎都唔算鞋，都整得唔錯。呢度啲飲品都幾特別，喺外面都未見過，好多都好想飲。朋友就揀咗華田脆脆，佢話甜味十足，加埋上面d朱古力脆脆，有口感之餘啱曬佢口味，正。我就叫左杯紅豆奶茶，因為出面都未聽過，覺得好特別。我無諗過原來奶茶加紅豆係咁夾，紅豆起晒沙，加埋奶茶又唔會太甜，將單調嘅奶茶變得有層次，真係好好飲。