鐵路便當 (Closed)

今日去朋友屋企，一心就諗住試吓土瓜灣名物「鐵路便當」聽朋友講佢成日好快就會賣晒，所以聰明嘅佢一早落咗單，我哋之後先再去攞。我哋今日叫咗三款，招牌滷肉便當，酥炸排骨便當配蜂蜜芥末，仲有紅燒虎掌便當，即係紅燒豬腳筋（呢個係間唔時先有）每一個便當都會配有五款配菜，佢每個星期唔同嘅配菜都可以喺佢哋嘅社交平台度睇到，今個星期有蒜泥雜菜，沙茶粉絲，辣炒雞丁，滷蛋半隻，同埋醃漬青瓜。講返個便當先，分量大得驚人，基本上餸菜同埋飯嘅比例係一比一，我晏晝2點食咗嗰個便當，到晚上七八點都未肚餓。講返食物，酥炸排骨便當嘅豬扒好大塊，基本上鋪滿成個便當。而且炸咗之後外脆內軟，丁點油益味都冇，所以唔會覺得好油膩，而喺面加咗啲醬汁就令佢冇咁熱氣。至於紅燒虎掌便當，豬腳筋紅燒後肥瘦各半，而且好入味，而且黏性好高，感覺膠質好重，有滿滿嘅骨膠原，所以食咗呢個係絕對可以飽足成日。最後想講埋每個便當都可以免費配阿薩姆紅茶，茉莉綠茶或蕎麥茶，或者以套餐價加配其他台式飲品。絕對係抵食之選，下次如果有機會兩個人會試一份便當再加兩個小食！