越滿 (Closed)

今日去旺角大掃貨，因為「思記outlet」清貨，買六件有四折，爽呀！買完野搵野食，周圍都好多人，最終嚟左洗衣街呢邊，唔駛同人迫。經過越滿，有八九成客，見價錢幾平咁，就入去試吓。越滿二人晚餐 A餐只係$178，B餐$298有七樣嘢，樣樣都幾鬼啱食喎，要個B餐丫！出菜好快，隔左陣啲野就上晒枱。鮮蝦米紙卷四件，合格水準。燒豬頸肉大碟，豬頸肉彈牙，都幾好食。燒雞半隻呢碟做得幾出色，厚肉，用香料醃左，就算唔蘸醬汁都已經好好食。外皮有啲脆皮，又好香香茅味，掂！咖哩軟殼蟹唔好食，食唔出有蟹味，唔夠熱又唔夠脆。炒芥蘭苗好香口，夠晒味。越式炒飯一大碟，好飽肚，但配料太少，用咖哩汁撈埋嚟食會好食啲。飲品兩杯可以喺兩頁飲品list度揀，除左打X嗰三款唔點得之外。一杯飲品散點都要三十幾蚊，但跟餐都唔駛補錢，幾抵。熱鹹檸檬水有半個鹹檸。我就揀左最特色越式滴漏咖啡，濃濃咖啡味，底下有煉奶，但太甜！下次要叫少甜先得。六樣野食加兩杯野飲，都好大陣容。以為啲野食係細細碟，原來都幾大份，係抵食既！