隆姐泰國美食館

Open Now

Now Closed

家人生日去食泰國菜，佢地推介隆姐，貪佢抵食又正宗，即管去試下。5個人叫咗8樣野食，雖然碟碟都係幾十蚊，但份量都算多喇!去食泰國菜必叫生蝦，隻蝦好大隻，新鮮爽口，夾埋生蒜點埋啲汁酸酸辣辣好好食。掙扎咗一陣應該要芒果沙津定係青木爪沙津好，最後要咗後者，啲木瓜有啲硬，同埋有啲過辣。炸蝦餅，熱辣辣又香脆，好香口好好味。飛天通菜，辣度剛剛好，正常發揮。冬陰公湯，有大有小，侍應話小嘅4人份量，大嘅就6人，於是叫咗個大，點知嚟咗兩個小，佢話大嘅冬陰公湯係咁，我心諗咁咪即係8人份量。算啦，冬陰公湯都算足料，一兜有2隻大蝦，有啲菇，酸酸辣辣好開胃，不過要小心細細粒青色辣椒，食中辣到飛起。另外仲叫咗青咖哩雞，嗌咗個印度薄餅一齊點汁食，好香好好味，呢個唔辣嘅，可以中和番!蟹肉炒飯，食咗咁多濃味野，再食呢個好似冇乜味，比較失色。飯後有椰汁西米露送，5個人食咗$600幾蚊，夠飽大家都好滿意。