焱燒串燒專門店 (Closed)

一到夏天天時暑熱，就好鍾意食串燒同埋啤啤佢😂今日試咗一間串燒店好味又抵食，一路食串燒一路嘆吓啤酒唔覺唔覺就吹水吹左兩個鐘，超爽！呢度啲嘢食即叫即燒，食物上枱時間都算快手，尤其燒生蠔🦪真係即叫即開即燒，所以特別新鮮鮮甜👍加埋蒜蓉同埋其他配料，小小香辣勁香蠔味，我同朋友食完都大讚 very good 👍土匪雞翼（3隻）夠晒鹹香而且雞翼多汁肥美原條蒜香茄子🍆當然係必食之選啦，呢度除咗用咗生蒜之外仲用咗好多炸蒜，又有另一番好味😋識落有少少七味粉同辣椒粉之間嘅味道，同茄子真係好夾！特別鍾意軟綿綿嘅茄子肉，一拉起就成條食， 勁滋味！煙肉金菇卷都係好推介嘅串燒好物，個人覺得煙肉夾金菇好食過牛肉夾金菇好多好多！我估係因為煙肉本身鹹鹹地，金菇吸收左自然更滋味啦！芝士大啡菇同汁燒大啡菇食落好Juicy，一咬落去大啡菇嘅汁仲會必出嚟，正到呢！而且鍾意店家好細心咁幫我哋將大啡菇切開一半👍抵讚👍呢度嘅串燒仲可以點佢哋自家秘製沙嗲醬同埋泰式醬，泰式醬冇出邊嗰啲咁辣，食落就好惹味👍至於沙嗲醬除咗好香沙嗲花生味之外，重帶少少辣，都幾特別呀！