牛記茶室 (Closed)

今晚無煮飯，兩個人諗住出街食。呢間茶室成日都去，有時去飲早茶有時食晚飯，早茶點心種類唔多，但都幾新鮮，晚飯都唔算貴，食物種類同茶餐廳差唔多，不過都幾新鮮，食完又唔會覺得好口渴。有特價小菜，48蚊都幾抵，不過有限制，我地兩個人只可點一款。仲有其他煲仔小菜，有荔芋煲、羊腩煲果D，糯米飯都有。特價小菜點左雜菇扒生菜，都幾好清清地，份量都幾大碟，新鮮熱辣。另外又點左荔芋滑雞煲，細細煲，不過一開蓋就好香。芋頭夠林又夠粉，好食，而且佢有落椰奶，好香又好滑，幾好食，雞都滑，不過得幾舊，但芋頭D汁撈飯都已經好好味。芋頭多過雞，但食太多芋頭好濟，都係汁撈飯好食D。食完飯有糖水送，今次係綠豆沙，之前食過麥米粥，都幾好唔太甜，好有住家飯feel，兩個人先百幾蚊仲有糖水，而且侍應同D客人都有講有笑，感覺幾好幾有人情味，之後都會繼續幫襯。