港原味 (Moved) New Location

兩個人去到大角咀都唔知食啲乜嘢好，見到依間港原味個環境幾靚，咁啱又有位所以就入咗去。睇完個Menu見到有二人餐就決定試吓。佢有兩個小菜兩個湯兩杯嘢飲仲可以要甜品或者蟹蓋，真係幾抵玩。先黎既係兩個湯，好足料好入味，係一個好好飲嘅老火湯。就咁依個湯都覺得佢好有誠意，聽講話個湯日日唔同唔知下次嚟到會係咩呢。咖喱雞肉農夫包，個咖喱味幾濃，入邊啲料都好豐富，有青椒有紅椒有洋蔥，雞肉都好多好嫩好入味，個農夫包本身都好大個好脆，點埋啲咖喱一齊食真係好正。本身個農夫包好大個所以都好飽，所以呢個冇跟飯。黃金鮮魷，鹹蛋味好強，好大碟份量好多，每一啖咬落去都有好勁嘅鹹蛋味，魷魚嘅鮮味都仍然保留到，仲要好好咬口，成件事好正好夾。芝士蟹蓋，芝士味好濃，有蟹肉之餘仲要有啲通粉喺上邊，食落都唔錯，幾特別。冇諗過芝士蟹蓋可以咁樣整，幾出色。