溏串小町 (Closed)

今次又走咗去大埔區搵食，大埔係啲行行吓就有幾間小店嘅地方，呢間日式小店睇落門面幾乾淨企理，又想食串燒，就去咗試一試。裝修係幾日系，裏面有好多日式海報同貼紙，舖面唔算大，不過好有居酒屋嘅感覺。晏晝嚟唔算多人。呢度落餐都係掃qr code嘅。都有幾多定食揀，有串燒，飯，同埋壽司拼盤，小食選擇都唔少，由刺身到炸物到串燒，基本上日式小食都有。於是叫咗個Hero串燒定食（$138）有雞翼，豚肉，冬菇，蝦，菠蘿等等，睇落係普通串燒嘅水平，但估唔到食落一啲都唔老唔乾！肉燒得唔韌，外面好香口，裏面仲好多汁，完全係意料之外。嗰調味都值得一讚，唔會好鹹但係幾惹味。菠蘿翠玉瓜好甜，亦都冇燒乾晒，個拼盤款式都算多。我覺得都幾抵食👏🏻另外小食仲叫咗個茶碗蒸（$12）茶碗蒸不過不失，個味道幾濃，蛋亦都整得夠滑，配料大大塊。另外一個蟹肉忌廉薯餅$（12）薯餅係炸得幾香口，不過蟹味就唔係好出。值得一讚係佢嘅炸物好新鮮金熱辣辣上枱，口感唔錯。仲叫多左湯烏冬，正常水平。總括嚟講呢間水平都唔錯就算，呢日平日去，都不斷有客入嚟幫襯，睇落名聲都幾好。而且個人覺得串燒來講係值得回味嘅選擇，可以一試。