六合小廚 (Closed)

天氣凍左，喺尖沙咀行完街想食番啲暖胃小菜，就上咗去平時lunch time 會去嘅六合小廚，試下佢啲晚歺。因為時間尚早，人唔算多，一入到去就安排我地坐卡位。再睇吓個晚餐餐牌， 除咗小菜之外，仲可以食火鍋 ，套餐，仲有炒蟹。最終點咗個228蚊嘅2人套餐。見咁平，我就加多個胡椒豬肚湯 。2人套餐有碟惹味口水雞 ，一個熱辣辣嘅魚香茄子煲 同一碟蠔油菜心，包白飯。口水雞好嫩滑，仲有雞脾肉，正! 魚香茄子煲唔太辣，唔太油，啱啱好。豬肚湯好足料，好多湯渣，仲有唔少嘅排骨。 最後埋單都只不過係328蚊，無加一，可以用咁嘅價錢喺尖沙咀食到咁飽，好抵食！下次會同多幾個人嚟試下個炒辣蟹套餐。不得不提，呢到啲伙記好有禮貌，仲非常好笑容添。