亞萊嘜嘜 (Closed)

我好多時都會喺荃灣食埋飯先返工，雖然係一個人食飯，但都想搵間企理啲嘅餐廳，靜靜地食個飯，唔想去的太過逼夾嘅餐廳。最近就比我發現咗呢間亞萊嘜嘜，坐得舒服，又有卡位，對住條大馬路，其實都幾寫意啊。呢間餐廳食左好幾次，所以就將所有圖擺埋喺同一篇文度出啦。如果你坐卡位嘅話，就會對住大馬路，景觀唔錯架。豬手飯。上菜嘅時候真係嚇咗一跳，豬手分量十分多，豬實有濃烈嘅滷水味，仲要炆得好腍，加上個滷水汁，真係忍唔住食曬成碟，佢仲配咗半隻滷水蛋添。豬手下面亦都有啲酸菜，送飯一流。雞扒叻沙湯麵。雞扒同湯麵會分開上，值得一讚。雞排又用醃料醃過，所以食落都幾香，而且煎得唔錯。叻沙都有少少椰香味，辣辣地幾好味。泰式炒金邊粉。醬料令到個金邊粉酸辣辣咁樣，食落都幾開胃嘅，仲有啲芽菜，蛋碎，豆乾，豬肉等等，係唔錯嘅。