相馬日式火鍋 (Closed)

今晚收工同男朋友又去食好野，去左荃灣食相馬日式火鍋！佢有好多款套餐，我地叫左「美國特選牛肉」$258果個套餐，佢有特選牛肉、豚肉同雞肉放題。佢有好多款湯底，我地揀左鴛鴦鍋—醬油湯同豚骨湯，其實黑松露牛乳湯、海老湯都勁吸引，下次再試佢其他湯底！其實一坐低，個侍應已經超有禮貌，好主動同我地介紹唔同套餐同湯底，仲有炸物同串燒任食，即點即整。因為男朋友真係好鐘意食炸野，我地叫左炸物先—冬菇、蝦、墨丸、餐肉同雞翼。都炸得幾香口，佢仲有黑松露沙律醬，好好味。跟住出去睇下佢D其他任食食物，都有好多款蔬菜（有我鐘意既萵荀同油蜜菜！）、配菜同丸類，仲有我最鐘意食既日本拉麵。同埋幾鐘意佢有埋透明簾遮住D食物，幾衛生。揀完其他野食之後，就係肉肉肉登場了～豬牛雞都好靚，D肉幾嫩滑，但係可能食得太多丸類，我地飽到叫唔到第二次肉！真係樣樣野都不錯，最後當然要食返個拉麵先得！同埋食埋枝紫米雪條（唔記得影相），好好味！不過仲有樣可惜既係，因為太飽，食唔到佢既串燒！下次一定要試埋。