AGE Bar & Restaurant (Closed)

好友生日，梗係要搵間好地方慶祝下，談談心。某天行過，見到門口有個易拉架寫住牛宴，見佢裝修都靚靚地，就一於試下喇。叫左兩個set,一個牛肩柳，一個係風車牛柳配意大利煙肉。佢而家做緊promotion，叫兩個set會送鵝肝或者青口，我地就揀左青口，估唔到送嘅份量都唔少，青口粒粒都好大粒，好有囗感，白酒味好香，真係好正。跟餐頭盤係意大利雲吞同露筍，雲吞都好好味，但得一粒，有啲唔夠喉。餐湯係椰菜花忌廉湯，友人話ok啦，我果個upgrade左海龍皇湯，聞落已經好香好香，飲落好重龍蝦味，又跟一隻青口同蝦，隻蝦非常爽口，好耐無飲過一個咁正嘅湯。飲完個湯已經7成飽喇。到主菜牛肩柳好滑，風車牛柳牛味好濃，都好正，不得不提係配菜嘅薯角，係估唔到咁好食。最後個甜品係mango cheese cake, 已經飽到食唔哂喇。book 枱時講左有朋友生日，係甜品碟上有寫happy birthday, 真係好細心，友人都好開心，非常滿意嘅生日飯。