捌加廿陸天婦羅居酒屋

Open Now

Now Closed

試過幾次行過呢個舖位都見到超多人排隊，今日算係比較早放工，又嚟襯吓熱鬧，食完就明點解會排長龍～一入店舖就感受到陣日本風，吧枱坐滿客人侍應亦好非常忙碌！呢間餐廳專食天婦羅，除咗唔同丼之外，仲可以自選，無論冷熱烏冬或者蕎麥麵都可以有得選擇，自由度好大！貪吃嘅我自選左六款炸物配冷蕎麥麵。餐盤擺放非常精美，有齊餐湯同生果。自選穴子、帶子、廣島蠔、黑虎蝦、本菇同粟米芯，每一款咬落都有驚喜！帶子估唔到係咁厚身，廣島蠔熟度剛好，肥美鮮甜。虎蝦大大隻，咬落爽口彈實，穴子口感結實，粟米芯咬落爽脆又清甜～朋友比我多點一款半熟玉子，夾開係半熟橙黃色流心，配丼飯真係一流！由於天婦羅都係即點即製，所以人多時點餐後要稍為等候，但總體都唔算太耐，而且餐廳流轉率都算快，自選咁多款炸物都係百零蚊，下次都會再嚟！