燒肉酒場 (Closed)

雖然係大熱天時，但都心思思想食下燒肉，於是就幫襯搬咗舖嘅燒肉酒場，而家個位置响登龍街永光中心。一坐低就嚟個檸檬燒酎，食燒肉又點可以唔飲酒呢。開始食肉之前先食過椰菜絲沙律，因為食燒肉都算熱氣，通常日本人都會食椰菜中和返啲熱氣。接着上枱嘅就有蒙古羊肉卷，肥瘦相間適中，羊味豐富。再嚟紐西蘭羊西冷，上枱時睇見肉嘅顏色已經覺得十分吸引，但係唔可以燒到太熟，如果唔係就會有啲韌，肉味比之前羊卷肉豐富。香蔥燒牛舌，雖然牛舌係薄燒，但都唔覺得韌，每邊燒十零秒就食得，加上炒過嘅蔥同炸蒜，惹味提升。跟住嚟壺漬牛肋條，牛肋條燒到一半要將佢剪開，咁個心就容易啲熟。因為牛肋條有啲帶筋嘅位置，所以都幾有咬口，要花啲時間慢慢咬，肉味香濃多肉汁。接着嘅係伊比利亞梅頭肉，梅頭肉肥瘦相間適中，燒完之後有豬嘅油分香味，呢個好好食👍最後燒返個柚子雞腿肉，肉先用柚子醃過，燒完之後有淡淡的柚子香，因為全部都係雞髀肉，所以好嫩滑。最後為咗飽肚加咗個羊湯烏冬，羊湯味唔算太騷，而烏冬就煙韌有咬口，兩個人share食份量啱啱好。銅鑼灣來講人均消費四百零蚊，食到咁多唔同嘅肉，感覺好滿足，肯定會再幫襯👍