1523 釗級廚房 (Closed)

今日去元朗出event係元朗大劇院附近收工，於是同同事係附近揾食。行左冇耐見到呢間1523釗級廚房嘅餐牌幾吸引，環境都唔錯又唔洗等位，於是就決定試下。美國黑安格斯Prime肉眼扒，牛扒有成12oz，厚度超過1cm，我地叫左7成熟，外面煎到睇落好似好熟咁，但切落好易切，仲一啲血水都冇，食落好嫩口，一啲都唔韌。配埋黑松露薯蓉無得頂。BBQ醬豬肋排個醬係餐廳獨家調配，醬汁好香蒜味令到豬肋排食落特別野味。豬肋排好大份，切開有成十條，啲肉算易咬，冇乜點癡牙，肉厚多汁。加20蚊仲可以配埋餐湯、蒜茸包同餐飲。餐湯係南瓜湯，好濃味又好creamy，稠度啱啱好，真材實料。蒜茸包烘到啱啱好，外脆內軟，食落好香口。食晚餐仲送忌廉酒，忌廉酒好滑好易入口，聞落幾香酒味但飲落又唔會好烈，食完咁多好野再飲返杯真係一級享受。