龍門冰室 (Closed)

同朋友去寶石戲院睇完戲，見到對面有間冰室就入咗去坐低食個午餐。呢度嘅食物選擇非常之多，而且種類亦都好廣泛。除咗有一般茶餐廳有嘅菜式之外，亦都有好多西餐，今次就決定試試佢。我哋要左一份all day breakfast同香蒜牛油帶子意粉。兩個餐都包餐湯沙律同飲品。先講個餐湯系超級足料嘅雜菜湯，入邊有蕃茄，薯仔，西芹，洋蔥，紅蘿蔔。而且非常大碗如果細食嘅朋友直頭可以當一餐！另外沙律份量亦都唔可以睇少，有粟米雜果同埋碎蛋，有家庭嘅味道。到個all day breakfast喇，依然份量驚人！有兩大塊牛油厚多士，一份超厚奄列，仲有香腸，煙肉，煙三文魚，薯餅，茄汁焗豆，好滿足呀！而意粉亦唔會差過d西餐廳，意粉唔會過淋，帶子都有好多粒，而且都算大粒。真系好抵食！而飲品都好有驚喜，叫左一杯奶茶紅豆冰，奶茶夠香夠滑，而紅豆亦夠淋。另外亦叫左杯mocha，竟然都唔差過coffee shop。價錢仲要咁平，真系好值得一試。