越一越南牛肉粉專門店 (Closed)

越南菜喺大家嘅心目中可能只係得牛油雞翼，生牛河。其實越南菜有好多都同其他東南亞菜好似嘅，都一樣咁好食！今日去開荃灣，心思思想食東南亞菜，見到尼間越式餐廳喺正大街旁邊，都係一個好選擇。餐廳喺正大街旁邊，雖然望住街景，但尚算開揚。餐廳燈光光猛，座位闊落，坐得好舒服。枱凳都係木造，感覺有啲東南亞風味。今次叫咗大蝦菠蘿炒飯，燒大蝦柚子沙律，鹽燒烏頭，菠蘿汁同甘荀汁。果汁係鮮榨嘅，店員話無添加糖，原汁原味。菠蘿汁大家就飲得多，尼度嘅菠蘿汁甜度酸度都啱啱好，又夠冰涼，好好飲！甘荀汁嘅甘荀味好濃，而且好清甜，幾特別👍🏻燒大蝦柚子沙律嘅柚子好多，一梳梳咁，食落好滿足！大蝦燒得好香，肉質彈牙！西芹再加上紫洋蔥再加上酸酸辣辣嘅汁，好有熱帶風情呀！加埋腰果一齊食，口感更豐富！鹽燒烏頭大大條，肉質實淨，冇泥味！燒得熱辣辣，食到停唔到口！大蝦菠蘿炒飯又點少得個菠蘿殻呀😂上面嘅大蝦同頭先嘅大蝦一樣，好彈牙，好好食！炒飯入面有魷魚同粒粒菠蘿，再加上紅蝦仔，好惹味呀！