河內越式料理 (西洋菜南街)

Open Now

Now Closed

今次試咗旺角嘅一間越式料理。入到舖頭，地方都唔算話好大，但都坐得算舒服，座位空間都好足夠。今次嗌咗兩個主食同埋一個小食拼盤。自己就嗌咗個極品牛三寶Pho, 朋友就嗌咗個炸軟殼蟹撈檬。個Pho 份量幾大，賣相相當唔錯。而三寶嘅生牛肉牛展同牛丸都各有各好味，不過個人最鍾意食牛丸，彈即得來好有牛味。湯底偏清淡，加返少少辣椒同埋青檸汁吊味啱啱好。撈檬亦相當好食。炸軟殼蟹嚟到仲係幾脆幾香口，蔥同埋芫荽都俾得好多。辣魚露係擺枱面自己落嘅，可以跟自己嘅口味落多啲或者落少啲。而檬粉都十分之爽口。小食拼盤就包括咗大部分嘅小食， 有春卷、米紙卷、蝦餅、雞翼同扎肉。嚟到嘅時候全部都熱辣辣，明顯係即叫即炸！味道方面全部都相當唔錯，想每樣食啲嘅人嗌呢個拼盤就啱晒。飲品方面就叫咗杯龍眼冰同埋凍華田。大大杯，幾抵飲！總括嚟講，喺旺角如果想搵啲抵食又飽肚嘅越南菜，推薦呢間俾大家可以試吓。