楚撚記大排檔 (馬頭圍道) (Moved) New Location

今日同男朋友去士瓜灣吓，行到有d肚餓，直接響度食埋晩餐先走，見到一間有大量小炒選擇，就入去試試。我地就點幾樣常食小炒睇睇師傅功夫。咕嚕雞球份量好多，酸甜比例做得不錯，雞球入口好爽滑，外脆內嫩，我自己食咗4-5件雞球，男朋友食得比我更多，好食又抵食。配料亦都好多，有鮮甜菠蘿，蜜桃，青紅椒。椒鹽白飯魚白飯魚好大條，唔會太鹹，食落香口，炸香蒜惹味，都唔錯。值得讚既係唔會炸得好油，炸粉都好少，出面好多時食炸粉多過咩，呢度就冇呢個問題。北菇愉耳紅燒豆腐個豆腐好熱，d汁好濃厚帶少少麻油香氣，咬開豆腐白雪雪滑嘟嘟，有豆香，外面少少脆既口感，唔錯，不過冬菇比較少，多番少少更佳。乾炒牛河冇點白飯，炒左碟乾炒牛河，賣相都好靚，色澤均勻啲，唔會好油，有鑊香。牛肉好滑，而且份量極多。如果芽菜多番dd，我會俾滿分。最後有甜品送，熱既番薯糖水，凍既清補涼，落足料，唔係求其比啲嘢就算。整體上，係大排檔既味道，當然乾淨好多同服務一流，好有禮貌，好細心。價錢方面亦都非常之合理，小菜方面其實有好多種類別，下次可以再嘗試其他，絕對值得一試。