洛奇冰室 (Closed)

大家知我母親節去咗流浮山食海鮮，最後食咗幾百蚊一個人，仲未計我哋入流浮山嘅時間🫠如果想近近地食到高質海鮮，其實登龍街呢頭真心好多嘢食，早排過嚟食居酒屋留意到有一間好多人食嘅冰室，當晚全場得一張空枱，仲要枱枱都係過嚟打邊爐，可見呢間晚市海鮮粥底火鍋幾受歡迎👏🏻今次2人份量火鍋套餐 ($198/位)係包咗指定七款海鮮拼盤，六款自選配料同粥底🍲 當日海鮮分別有帶子、鮑魚、沙白、蜆、生魚片、蝦同肉蟹🧡 一開頭都唔會期望好大，點知隻隻蜆同沙白都鮮甜冇沙，隻蝦新鮮到仲識跳，仲有帶子、鮑魚呢啲回本海鮮，最印象深刻就係肉蟹因為真係爆多膏同勁多肉🤣 同埋店家好細心拆晒蟹啲唔食得嘅部位，全部海鮮都洗得乾淨👍🏻六款自選配料就揀咗牛肉芝心丸、松露香菇香丸、金沙魚丸、養顏花膠片、娃娃菜、肥牛，自己同朋友都覺得佢哋嘅丸類好出色🥳 金沙魚丸其實係有鹹蛋黃流心嘅魚蛋，真心好有驚喜🤩 芝士牛肉丸同貢丸都好juicy🤍而且呢個價錢有咁多塊花膠其實真係食得好盡興😚其實淨係食配料都已經飽到上心口，中途店家會上南瓜、芋頭、粟米，煲到最後啲南瓜同芋頭會變蓉，呢個時候就可以加埋粥底同蛋撈返個粥底嚟食，個粥底索晒之前海鮮啲精華超鮮甜