御名園 (Closed)

今日去搵將軍澳朋友，佢介紹左天晉匯的御名園，主打食中菜海鮮，價錢公道，又唔會好迫好嘈，味道仲要非常好，果然冇介紹錯。我哋叫咗兩個小菜、一條老虎斑、一個炒米粉，樣樣都有海鮮配料，食得咁豐富都只係六百零蚊，真係好抵食囉！餐廳其實做緊優惠，見到有好多海鮮小菜都做緊特價，下次要再嚟食過試吓其他菜先得。蜂蜜柚子明蝦球：呢個蝦球真係整得好出色，每粒都大大粒，而且又爽口新鮮，外邊係炸到脆卜卜，配埋蜂蜜柚子汁，就唔會太過熱氣，仲酸酸甜甜，零舍開胃。XO醬翡翠炒黃金海螺片：呢個海螺片由於用XO醬炒，味道故知然香濃入味，海螺片夠爽口，再加埋云耳、翠玉瓜等配料炒埋一碟，真係好味道，送飯一流。蒸老虎斑：呢條老虎斑只係$168，有成斤重，好大條。老虎斑非常新鮮多肉，肉質夠實夠彈牙，口感好好。而且酒樓用嘅蒸魚豉油都係好味，成條魚非常入味，食得好過癮。海鮮家鄉炒鴛鴦米：鴛鴦米原來係米粉加粉絲，炒埋一齊，師傅嘅手勢好好，炒得非常乾身，有蛋絲芽菜等等，但係都唔會整到個米粉出水。配料另外有蝦、魷魚，樣樣都好新鮮爽口彈牙。食完仲有蛋白杏仁茶送，真係好驚喜。總括嚟講今晚餐飯我同老友都非常滿意，下次會再嚟幫襯。