金記冰室 (都會駅) (Closed)

呢度唔係樣樣抵食，但有啲選擇係超值既~早餐可揀牛奶麥皮配烚蛋（2隻），盛惠$29，包飲品。飲咖啡的話，呢度的咖啡應該係即磨，但仲有一個更抵的選擇：鮮奶！！早幾個月我喺無意之間發現呢度的餐飲轉熱鮮奶係唔使加錢架（其他茶記熱鮮奶要+$3-5）。牛奶麥皮幾大碗，係雙奶（鮮奶+煉奶；煉奶獨立上，可自行決定落幾多），食曬都幾飽，通常我會帶走1-2隻烚蛋，當點心。呢度的早餐供應至1130，如果接近1130嚟到，早餐可充當午餐（份量係午餐的輕食版）。茶餐的話，我通常會點麵包餐，價格視乎所揀包類而定。提子麥包餐$21，但有時提子麥包會賣曬（尤其早餐時段；早餐同樣有麵包餐），健康啲的次選可考慮同價位的豬仔包。同樣，茶餐可配熱鮮奶。最近一次光顧，一心想搵個地方傾計，揀咗呢度，點咗麵包餐，（因單點1杯熱飲~$20），而提子麥包則外帶。朋友點咗炸雞脾配迷你西多士餐，細份啲，但佢食得都ok。呢度大部分伙記幾helpful。環境方面，呢度差唔多全部都係卡位，好適合人少少t傾計。