蠔站 (將軍澳中心) (Closed)

將軍澳咁多區， 我最鍾意就將軍澳站，因為有三個大商場連住，餐廳又多， 想食乜都有，真係方便。 今日行完街， 除咗有滿滿嘅戰利品之外， 都想搵間坐得舒服嘅餐廳輕食下嘢， 竟然俾我搵到間食蠔嘅餐廳， 仲有$10蠔供應，梗係要試下啦。叫咗一打$10蠔， 賣相都好靚仔喎，餐廳職員話係法國蠔，仲配cocktail醬同埋檸檬。 食落新鮮， 最緊要係乾淨冇蠔殼碎， 幾好幾好。另外叫咗個四式芝士pizza， 係薄批嚟嘅，做得好出色有淡淡嘅藍芝士味，我好鍾意。冬陰功海鮮扁意粉係我嘅推介， 首先睇下擺款幾靚，有個心形㗎。 另外佢嘅意粉煮得啱啱好，有口感， 最正係佢個冬陰功汁， 小小辣，真係好好味，呢個記住要趁熱食，包你滿意。餐廳喺將軍澳中心，喺將軍澳站好易行過去， 大家如果突然間想食即開新鮮生蠔， 真係一個唔錯嘅選擇，另外我有少少發現， 我見到有幾台客都叫個鐵板牛扒食， 我睇到個賣相都好吸引，成間餐廳都瀰漫著牛扒嘅香味，下次一定要試下先。