牛陣 (Closed)

簡單講就係將日本間「牧場」火鍋店概念搬過黎香港搞，不過稍為混亂，$100~160 澳洲牛肉，$220~370 日本和牛，總共有十幾個價錢，唔同價錢唔同級數（即係任佢嗡），價錢已經包湯底，有日式甜汁湯底（Sukiyaki）同清湯（Sabui Sabui），另外仲有鐵觀音湯底等等不知名湯底，甜汁湯底唔太甜，頗適合香港人口味，亦唔需要點芝麻醬或者豉油已經夠味道，不過切記甜湯淥菜會變韌，冇得解，祇係經驗之談。我點左$150 澳洲牛肉放題，大概等左十五分先上牛肉，侍應生話即切牛肉所以要略為等等，除左牛肉佔大部分之外，仲有豬肉同豬腩肉，牛肉比掌心略大，切到紙咁薄，門口個侍應生似機械人，木口木面，講野又細聲，唔多知佢想點，反而入面個大嬸仲有禮貌解釋個任點任食規則，當第一碟差不多食完又會主動問下駛唔駛追加牛肉，　不過一碟都飽到上心口。有大量自助菜蔬，生果有木瓜，甜品有雪糕，咁嘅價錢尚算抵食。