小城鎮 (Closed)

同大帝剪完頭髮就過來食飯，因為時間尚早唔使等位就入得，叫左個2人套餐B，有餐湯，沙律，小食，主菜，甜品，連西冷扒都唔使加錢要左1餐湯1沙律，湯係南瓜湯咸咸甜甜仲有未溶晒既南瓜幾好飲，沙律菜加埋酸酸甜甜既汁同芒果好開胃。小食要左七味粉炸雞脾菇，外脆內多汁，微微七味粉既香辣味唔錯。主菜要左燒香草法國春雞配炸魷魚圈，10oz安格斯西冷配薯條，西冷要左5成熟度剛剛好，煎完有攤抖足夠時間唔會有血水滲出，肉質幾嫩有汁👍👍粗薯條香脆好味。燒春雞皮都幾脆，肉都尚算軟嫩，係胸位比較乾，味道亦唔錯。甜品要左1個草莓奶凍，1個時令鮮果奶凍，原本對餐甜品無期望，但幾有驚喜，擺盤有花心思，奶凍香滑配埋果醬同生果一齊食好match。餐廳佈置成懷舊火車站，收銀位置好似售票處，連d燈都好特別好靚。有位瘦瘦既女侍應見到大帝用手攞麵包沾湯食整污糟手即刻攞濕紙巾俾我地，好貼心亦有笑容。