京林屋 (Closed)

事實上之前喺希慎見過都有啲興趣，不過可能唔單止供應甜品嘅關係，排隊嘅人都幾多，但我冇乜意欲要去排。因為約左人喺圓方附近等，又未到時間所以我地黎左呢間京林屋。呢間分店位置唔多，有幾張枱加一張長身高枱，但以外賣店形式經營，所以即使點甜湯，都以膠碗盛載。餐牌供應雪糕、甜湯、餡蜜、飲品等，冇主食基本上唔會佔用位置太耐。雪糕分筒裝、杯裝、芭菲，有牛乳、抹茶、焙茶三款口味，定價$38-78。先喺收銀歲點單，牌子振動後可以自取。店內亦有提供膠杯及水機。抹茶紅豆白玉軟雪糕 $56其實係有紅豆的，不過喺哂背面，所以正面看係完全睇唔到紅豆蹤影。抹茶味唔夠濃，冇咩回甘苦澀可言，質地雖然滑但好厚好厚， 雪糕溶點低，玩左好耐嘗試影到紅豆都未溶。白玉丸子都幾煙韌，可惜雪糕筒好似漏氣餅乾。焙茶紅豆白玉脆米 $52焙茶味雪糕同樣平平無奇，茶味要dap得好認真先感覺到，雪糕嘅質地冇抹茶咁厚，至少我食得哂成杯。紅豆一pat pat咁，冇乜口感可言，幸好並不甜膩。個人喜好脆米夾喺雪糕層中間，呢杯嘅做法係加喺最底。