Video
Read full review
2014-07-14
1040 views
之前提及嚟到The Pudding Nouveau摸門釘，改咗去食PizzaZaZa，雖然唔會話食佢唔到唔憤氣，但朋友話點都要一試，就擇日重賽再嚟「拔釘」，仲要預早少少嚟，避開少少人潮。7:00pm到達，果然好多客，已經坐滿成間鋪，猶幸門口無乜人龍，得我哋同另一組客，等一陣就已經有位嘞。The Pudding Nouveau屬Lassana旗下一員， 繼續以小店模式經營，室內環境確實幾細，廿個位都唔知有無。一室黑與白，營造出法式咖啡小店，不過，香港始終地貴人多，枱櫈排得密集之餘，人聲也有點吵，好老實，隔離枱嘅女生呀，我真喺無心偷聽妳哋講自身嘅秘密！所以，想感受一下法式嘅悠閒風情，或許閒日晏晝可以啩！一心嚟依度食佢啲甜品，但總要搵少少鹹點墊墊肚。牆上手寫黑板有一列鹹點套餐，包任何鮮磨意式咖啡或茶，如意大利泡沫咖啡、伯爵茶、洋甘菊……等等。雖然有4款選擇，不過，是晚就只得番牛角包一款。睇之前其他人嘅食評，大讚啲班尼迪蛋，好可惜今晚無緣一試。煙三文魚蛋沙律牛角包伴沙律菜 $68單睇啲煙三文魚嘅份量，就知絕對無欺場，唔會淨喺得啲蛋沙律，煙三文魚得一、兩片。牛角包烘得金黃，鬆脆富牛油香；煙三文魚
The Pudding Nouveau屬Lassana旗下一員， 繼續以小店模式經營，室內環境確實幾細，廿個位都唔知有無。一室黑與白，營造出法式咖啡小店，不過，香港始終地貴人多，枱櫈排得密集之餘，人聲也有點吵，好老實，隔離枱嘅女生呀，我真喺無心偷聽妳哋講自身嘅秘密！所以，想感受一下法式嘅悠閒風情，或許閒日晏晝可以啩！
一心嚟依度食佢啲甜品，但總要搵少少鹹點墊墊肚。牆上手寫黑板有一列鹹點套餐，包任何鮮磨意式咖啡或茶，如意大利泡沫咖啡、伯爵茶、洋甘菊……等等。雖然有4款選擇，不過，是晚就只得番牛角包一款。睇之前其他人嘅食評，大讚啲班尼迪蛋，好可惜今晚無緣一試。
煙三文魚蛋沙律牛角包伴沙律菜 $68單睇啲煙三文魚嘅份量，就知絕對無欺場，唔會淨喺得啲蛋沙律，煙三文魚得一、兩片。牛角包烘得金黃，鬆脆富牛油香；煙三文魚味道煙燻鹹香、油潤豐厚，配合蛋沙律嘅酸酸甜甜、濃郁蛋香，口感實在，滋味滿分；而伴碟嘅沙律菜亦加有油醋調味，酸香清新。
鮮奶咖啡 （跟餐）曾經晌觀塘Express Bar by Lassana 跟過店主之一嘅Tracy學拉花，亦品嚐過佢嘅手勢，今晚晌度再遇到佢負責沖咖啡，真喺點可以唔點至鍾意嘅鮮奶咖啡呀！簡單一個拉花，已盡見功架，拉花圖案清晣，圖案尖尖位對正返咖啡杯身嘅餐廳商標，咪以為「符碌」，喺刻意拉成，而且，啱啱好倒到一整杯滿滿，一滴都無瀉出嚟；飲佢啲鮮奶咖啡喺絕對唔使落糖，落奶手勢好，奶同咖啡溝得勻，唔使再攪就可以飲出柔滑、香醇、均勻嘅口感。
芒椰沙冰 +$8散叫正價收$32一杯，跟餐補番$8就可以喇。兩位朋友同時都點咗芒椰沙冰，的確賣相極之討好，白跟黃，色澤亮麗，又充實陽光氣息，濃郁嘅芒果沙汁，加入香甜嘅椰奶，幼滑冰涼，消暑奇「冰」喔！
講完啲鹹點輕食套餐後，就輪到「主角」登場。餐牌印製精美，圖文並茂，包含多款窩夫、乳酪、奶凍、刨冰及特色甜品。
香蕉朱古力窩夫 $58窩夫喺我哋想試嘅重點，4款窩夫（鮮芒果、曲奇忌廉、香蕉朱古力、雜莓）我哋揀咗後兩者。窩夫熱辣鬆脆，餅心卻好軟熟，又有蛋香；再配上完熟嘅香蕉肉、朱力古粒、濃郁幼滑嘅朱力古雪糕，夾埋一齊食，冰火嘅口感，甜蜜嘅滋味，如淋上多啲多啲朱力古漿，就梗啱我添。
雜莓窩夫 $62香蕉換上雜莓（紅桑莓、黑桑莓、藍莓、士多啤梨），雪糕換上雜莓味，果漿改唧上士多啤梨味，就成為依道色彩繽紛、成份小果園嘅雜莓窩夫。幾款生果都非常新鮮，各帶有唔同味道，夾在雪糕與窩夫同食，跟香蕉朱古力窩夫感覺截然不同，清新醒胃，酸甜有緻，有種夏日跳脫嘅感覺。
檸檬芭菲 $54賣相別緻嘅檸檬芭菲，色澤對比鮮明，而忌廉、牛奶所做嘅芭菲，極之輕柔幼滑，檸檬清香味非常突出，入口清爽自然；而兩側嘅拿破崙酥皮鬆化酥香，點綴用嘅紅桑莓提升酸香層次，整件甜品都好睇好食。
雖然今晚咁早嚟，都已經話有好幾款甜點已暫停供應，例如：心太軟、梳芙里，可見小店仍大受歡迎。試過其中幾款食物，無論甜定鹹，都感受到小店嘅用心製作，「人龍」之勢亦非浪得虛名！
Post
