亞參雞飯 (新翠商場)

Open Now

Now Closed

同老友路經柴灣新翠商場，辦完公事要醫肚，見到亞參雞飯，門面吸引又坐得好滿，就入去試下。舖頭嘅口號話自己嘅海南雞飯值99分，食完都覺得冇花假。我哋叫咗招牌去骨海南雞飯、巴東牛肉飯、香烤豬肉串、香煎手作蝦餅、南洋凍咖啡、凍薏米水。因為又想食咖哩，所以再點咗個好抵食嘅輕盈馬來咖哩雞撈麵下午茶。碟海南雞有雞髀肉同雞胸肉，三黃雞大隻多肉好有雞味，胸肉柔潤鬆化，多肉汁唔鞋，吸左碟底嘅調味汁更加好味。油飯香軟味佳，熱騰騰嘅雞湯都好好飲。巴東牛肉食落半筋半肉，彈牙冇渣，香料汁濃郁惹味有椰奶香，口感層次豐富，但有d麻辣，配杯凍薏米水最夾。呢度嘅小食都做得好出色，豬肉串肉質鮮味彈牙，肥瘦適中。蝦餅厚身，彈牙抵食，啖啖充滿鮮蝦味，記住要趁熱食。咖哩雞撈麵輕盈版份量也不少，咖哩唔辣，有馬來風味，充滿椰香，雞肉結實有嚼勁，仲有埋薯仔毛茄增加食用纖維。呢度嘅南洋咖啡、馬來拉茶已經落咗糖，兩樣味道都香濃，幾有特色，與港式口味不同，值得一試。我地留意到經理同待應做事勤快有禮，有團隊精神，值得讚賞。