皇府 (Closed)

今日下午我們喺觀塘做完嘢之後，我們去咗已經有好一段時間無去嘅九龍塘又一城行街，之後我們去咗「皇府」食晚飯！喺諗緊叫咩食嗰陣，我們問店員有咩招牌食物推介？店員就推介咗鮮蝦帶子雲吞麵同食神叉燒飯！鮮蝦帶子雲吞麵嘅麵質好爽口彈牙，而且都幾幼身，雲吞嘅皮好薄身嫩滑，蝦肉亦幾鮮味彈牙！而食神叉燒飯就係我們最期待嘅，叉燒嘅肉質非常鬆化軟滑，唔會有好硬實嘅感覺，蜜汁嘅味道亦好香甜，而鷄蛋就喺落單嗰陣店員會問我們想要太陽蛋或熟蛋？我們就揀咗太陽蛋，煎出嚟嘅效果好似熟咗啲啲，但就好香口！另外我們再單點咗老火例湯：木瓜花生豬骨湯煲得好夠火候，湯底嘅味道相當香甜濃郁！豉椒鷄絲炒河嘅河粉質感都幾煙煙韌韌，鷄絲嘅肉質好軟滑！去骨海南鷄飯嘅肉質好嫩滑，而油飯就有一股「油益味」，我們同店員講話有啲「油益味」，店員亦好有禮咁換咗一碗白飯畀我們，值得一讚！鮮鯇魚腩粥嘅粥底煲得好綿，味道好香甜，鯇魚腩嘅肉質相當鮮甜嫩滑！